
當人哋知道我想為自己的寵物舉辦寵物追思會時,我經常見到對方一臉疑惑,好多人會問:「寵物都可以有追思會?」
如果你都係咁諗,你一啲都唔孤單。
寵物追思會唔單止可以比主人一個特別、有意義嘅方式去懷緬毛孩,仲可以幫助主人面對失去寵物嘅傷痛,慢慢開始療癒心靈。
之所以我會認同,其實都係因為自己曾經經歷過至親毛孩離世嘅痛苦——我最摯愛嘅聖班納犬Luis離開咗我。
失去Luis之後,我感受到前所未有的空虛
Luis離世後,我完全唔識得點樣去面對。起初好shock,跟住變得麻木、悲傷、心碎。我覺得自己好孤單,呢隻陪伴我咁多年嘅大毛孩唔見咗,成個世界都變得唔一樣。我一直以佢為生活重心,日日都安排好佢嘅照顧同活動,但當佢唔喺度,我完全唔知點樣過日子。冇咗佢,冇咗日常Routine,連帶我平時接觸嘅獸醫、專家等等都彷彿變得好陌生,變得遙遠,突然好迷失。
呢種空虛同寂靜,好似將時鐘嘅秒針停咗咁,但慢慢意識到唔可以再係咁,我開始覺得我需要做啲嘢。最後,我決定——Luis係應該值得被紀念,所以開始著手計劃佢嘅追思會。
籌備追思會,是我心靈被療癒嘅開始
原來,籌備追思會嘅過程係一種非常有幫助嘅治療。我發現,呢個過程比咗我一個出口去面對自己嘅傷痛,而唔係單純咁避開。我花咗好多時間去整理每張嘉賓名單,邀請所有曾經被Luis影響過嘅人;搵返大量相片同影片,用嚟佈置禮堂;我一邊諗流程,一邊回憶起Luis陪伴我嘅點滴。
有人問我:「會唔會做得太多?」我答:「可能有,但可能我對佢嘅愛從來都係咁多。好多人覺得只係一隻寵物,但我從來冇後悔過。」
呢個過程令我再次搵到生活嘅意義。我喺做緊一樣有意義嘅嘢,去紀念Luis,去承認佢曾經存在過,亦幫助我慢慢接受佢已經離開嘅事實。
寵物追思會,帶來難以形容的溫暖
Luis嘅追思會對我嚟講,係一個難忘嘅經歷,因為:
• 呢場活動,畀咗我一個方式去表達自己對Luis嘅思念。
• 出席嘅人畀我無限嘅愛同支持。
• 大家分享有關Luis嘅故事,令我覺得自己唔再孤單。
• 呢個追思會,幫助我開始處理失去Luis嘅情緒。
• 我發現,Luis唔止對我嚟講好重要,佢同樣影響咗身邊好多人。
當我見到咁多人專程嚟到追思會,分享佢哋對Luis嘅回憶,講佢哋點樣被呢隻「大毛孩」啟發,我真係好感動。
點樣為毛孩籌備一場有意義的追思會?
如果你都考慮為你嘅寵物舉行追思會,以下幾個貼士可能對你有幫助:
揀一個可以令所有人都可以安心舒適嘅地方
人少少當然可以揀寵物最鍾意嘅地方,例如佢最愛嘅公園或屋企等等,但我揀咗一個寵物善終嘅禮堂舉行,禮堂嘅色調好溫暖,唔似得人嘅靈堂咁冷冰冰,同時間可以將一啲唔想帶返屋企嘅情緒,可以喺呢個空間度釋放。
邀請真正鍾意寵物嘅人
細心諗下毛孩曾經接觸過啲咩人,例如鄰居、朋友、獸醫、狗場職員等,佢哋都可能會好想參加呢個追思會。
避免邀請「唔明白寵物價值」嘅人
唔係每個人都理解失去寵物有幾痛,有啲人甚至可能會有批判眼光。如果擔心呢啲人唔尊重你嘅感受,先唔好邀請佢哋,以免影響氣氛。
讓小朋友參與其中
如果屋企有小朋友,俾佢哋參與策劃同儀式,對佢哋認識失去同學習點樣處理悲傷好有幫助。
事前準備講稿
如果你有勇氣,喺追思會上講講同寵物相處嘅點滴,大家都會好感動。回憶毛孩嘅好時光,對自己同在場嘅人都係一種安慰。
可以考慮搵專業主持人
就好似人類追思會有司儀一樣,其實亦有專業人士可以為寵物主持儀式,幫助整個過程更加順利,令活動更具紀念價值。
允許自己釋放情緒
寵物追思會唔一定要好嚴肅,其實係可以開心咁去紀念毛孩,例如準備啲佢最愛食嘅嘢,播放佢嘅相片,甚至做個彩虹橋蛋糕,邊笑邊喊都冇問題。
你決定幾時辦
冇規定要即刻舉行追思會,可以等到自己準備好再去做,最緊要係對自己有意義。
以愛與回憶慶祝毛孩的一生
諗返嗰一日,Luis嘅追思會唔單止比我一個機會去回顧佢美好嘅一生,亦提醒咗我,愛同回憶係永遠唔會消失。
如果你都失去咗毛孩,千祈唔好怕傷心,試下以自己鍾意嘅方式去懷緬佢哋。因為無論點樣,佢哋都永遠喺我哋心入面,陪住我哋每一個悲傷同快樂嘅時刻。
Comments