冬天嚟到，冷風陣陣，唔少狗主仔都開始擔心屋企嘅毛孩會唔會凍到唔舒服。特別係細型、年老或者體弱嘅狗狗，喺寒冷天氣底下更加需要額外嘅關注。如果你都想知道點樣幫狗狗暖住過冬，以下呢篇詳盡攻略就啱哂你！
狗狗會唔會怕凍？品種大不同
一般嚟講，狗狗係恆溫動物，體溫維持喺38.3°C至39.2°C之間，比人類高少少，加上皮毛本身有保暖功能，所以部分狗狗係比較耐凍嘅。但並唔代表所有狗狗都可以輕鬆應對冬天！
以下幾類狗特別容易怕凍：
迷你細隻狗：例如芝娃娃、松鼠、摩天使等等細細粒嘅狗，身體散熱比大狗快，保暖能力相對較弱。
扁鼻狗狗：例如八哥、老虎狗等等佢哋呼吸道較短，無法有效調節體溫。
年紀大嘅狗狗：年紀大嘅狗狗新陳代謝慢，皮毛變薄，對寒冷環境適應能力下降。
病弱狗：例如患病或者剛做完手術嘅狗狗，免疫系統較弱，對寒冷特別敏感。
剪毛狗：例如史納莎或貴婦，剪咗毛後保暖能力下降。
如果你嘅狗狗屬於以上類型，就要特別小心，喺冬天加倍留意佢嘅保暖措施。
狗狗怕凍？觀察佢嘅行為就知！
狗狗唔會講嘢，但佢哋會透過行為話俾你知自己冷唔冷。以下幾個信號值得注意：
震震震：狗狗如果身體不停震，好似開咗震動模式，咁就真係凍到極限啦！
縮埋一團：如果見佢攬住自己瞓，尾巴遮住鼻或者肚，呢個係佢嘅「禦寒大法」」。
唔願郁：狗狗動作變慢，甚至唔想郁，可能係想節省熱能。
行路小心翼翼：有啲狗會抬高腳，唔願意踩落冷冰冰嘅地面。
如果發現狗狗出現以上情況，就應該立即幫佢保暖，或者帶佢去暖啲嘅地方。
天氣太凍，會對狗狗健康有咩影響？
凍親唔單止係短暫嘅不適，更可能導致以下健康問題：
感冒或肺炎：天氣凍會令狗狗免疫力下降，容易受病毒或者細菌感染，出現咳嗽、流鼻水、打噴嚏等症狀。嚴重嘅話可能演變成肺炎，影響呼吸。
關節炎或關節痛：年長狗狗喺寒冷環境中容易出現關節僵硬，甚至發炎，影響行動能力。
低溫症：狗狗嘅體溫如果降到37°C以下，會進入危險狀態，可能出現呼吸困難、心跳減慢甚至昏迷。呢個情況需要立即送醫急救。
狗狗著唔著衫？視情況而定
唔係所有狗狗都需要著衫，但有以下情況時，你應該幫狗狗添件衣物：
屬於怕冷品種或者年紀大嘅狗。
要喺戶外長時間活動，例如散步或者旅行。
居住環境比較寒冷，室內冇暖氣。
但如果你嘅狗狗係天生耐寒，例如Husky、阿拉斯加雪橇，咁就未必需要額外著衫。
如何選擇合適嘅狗衣服？
尺寸要啱：衣服唔可以太緊或者太鬆，要以狗狗活動自如為主。量度胸圍、頸圍、背長後再選擇合適尺碼。
材質要舒服：選擇柔軟透氣嘅布料，例如純棉或者羊毛，避免刺激狗狗皮膚。
設計要簡單：避免過多裝飾，例如蝴蝶結、帽子或者拉鏈，簡單嘅款式更適合狗狗日常活動。
顏色要鮮明：亮色或者反光設計嘅衣服喺戶外更加安全，容易俾其他人或者車輛注意到狗狗。
狗狗過冬的其他保暖貼士
除咗著衫，仲有其他方法可以幫助狗狗保持溫暖：
溫暖嘅睡窩
準備厚厚嘅墊子或者毯子，擺喺乾燥無風嘅地方，俾狗狗瞓得舒服又暖笠笠。
高熱量飲食
冬天消耗較多，適量添加高熱量嘅食物，例如雞肉或者三文魚，有助狗狗抵禦寒冷。
適當運動
散步或者玩遊戲不但驅寒，仲可以促進狗狗血液循環。記住運動完要即刻抹乾狗狗嘅毛，避免濕氣引起感冒。
用暖墊
喺狗狗嘅活動區域放暖墊，但要注意安全，確保狗狗唔會直接接觸過熱嘅物品。
讓狗狗開心暖冬！
寒冷的冬季不應成為狗狗健康的挑戰，而應該是牠們感受到更多關懷的時候。透過以上保暖措施，確保愛犬在冬天依然健康快樂，享受主人的貼心呵護。
Comments